المساعد الشخصي الرقمي

مشاهدة النسخة كاملة : أنا انا عطبرة


مجموعة المهاجرين
12-29-2012, 07:20 PM
بكتب اليكم ياشباب أوطانى قصه معبره

واسرد كمان تاريخ نضال الباسله امنا عطبره

قلعة صمود أشجع رجال أسياف معزتا مشهره

فى وجه كل باغى وعنيد دايما تقيف متصدره

ساعة الجبال ترجف تزح شجعانا ما بترجع ورا



دايما بتكسح الأمام نار الجهاد بتسعره

قلعة نضال أم الرجال أسياف معزتا مشهره

ديمه بتناضل وتنتصر طول النضال ما بفتره

وظلموكى جد ياعطبره يوم قالو عنك مقبره

سموكى موسكو عشان صفا الجاي عليكى معكره


والقال عليك زى دا الكلام ياريتو لو كان يوم قرا

لو بقرا كان الغيب أكيد كان شاف نهايتو مسطره

مكتوبه بى دم الرجال الطاهره فوق ضهر الثرى

ديل ما بيرضو الذله يوم مهما تكون متستره

ويقيفو فى وش البجور مهما جيوشو يجمهره


ديل كبرياهم ما بهون لو تبلغ الروح آخره

ما قال أنا القاسى العنيد وسقوطى ما فى المقدره

وهتفنا نحنا كمان حديد حتى الجبال بنكسره

زار كل أقاليم البلاد جاتو الجموع متجمهره

تهتف يعيش لينا الرئيس تاج المكارم وجوهره


بس الا فيك لاقى الغنم فى كل درب مستنظره

وحلف يمين ياعطبره أولادك انتى يبعثره

عمر أقاليم البلاد قال تبقى بس متأخره

كان ظنو روح الثوره فيك بسلاحو يفجر يقهره

وقاصد يدمر لى بنيك وكلابو يحشد عسكره


ماليه الدروب تنبح تعض ما لاقيه زولا ينهره

لما الجواسيس والكلاب وذوى النفوس الغادره

ورصد حركة الناس جميع كل المخارج خفره

ضيع كمان أجمل قيم حتى الحقايق زوره

أصبح أمير المؤمنين أقوالو كلها دستره


ولى كل راى مصلح ظهر لى صاحبو سب وازدرى

ورماهو فى بطن السجون أو دفنو جوف الثرى

وكمم خشوم كل الرجال فاكر الحقيقه بيقبره

وفرض وصايتو على الجميع فاكر ولادك قاصره

وآمال ولادك فى الحياه لى ريح ضياعم ضرضره


وطمس كمان صفحات نضال مكتوبه بالدم نيره

منقوشه فى لوح الخلود لكين نساها وأنكره

عارفنا ما بنرضى الهوان أسياف جهادنا بنشهره

ولى غازى على البلاد تربتنا تصبح مقبره

نفديها بالروح والدماء جوه القلوب متحكره

وأنـــــــا عـــــطــــبره


ثورة براكين الغضب ما بستكين لى سيطره

وانا عطبره

رمز الصمود رمز النضاال أنا باسله ديمه وظافره

وأنا عطبره

أنا سكة أكتوبر مشيتا وسرت فيها لآخره

وأنا عطبره

أنا قلعة الثوار وعاصمة الحديد والنار وأم المقدره

وأ،ا عطبره

وقفت فى وش مايو كم كم ثرت فى وش جعفرا

وأنا عطبره

كم ثرت فى وش الأعادى يمين عيان مافى الضرا

وأنا عطبره

أنا كنت لى أبريل شراره شبابى هب وجمره

وأنا عطبره

أنا قايدة الثورات دوام دى حقيقه مين البنكره ؟؟

وأنا عطبره

صفحات نضال لى كل جيل بى دم ولادى مسطره

وأنا عطبره

قلعة نضال أم الرجال أنا طاقه عاتيه مسخره

وأنا عطبره

أنا يقظه صاحيه مدى الدهور أجفانى ما بزوره الكرى

وأنا عطبره

منى الشراره بتبتدى وأنا كل ثوره بفجره

وأنا عطبره

أولادى شايلين القسم الجار سنينو تعكره

آلاف تموت ععلشان تكون للجايى بعدها معبره

شان يحيا مستقبل جميل وحياتو تبقى منوره

وعلشان يضوق طعم الأمان وسط المداين والقرى

أناعطبره أنا عطبره أنا عطبره


4 رمضان 1405 هجريه

مهدي الغبشاوي
02-24-2013, 09:26 PM
من اجمل القصائد التي قرأتها أخيرا