المساعد الشخصي الرقمي

مشاهدة النسخة كاملة : هي عاد كدي


مجموعة المهاجرين
07-02-2014, 07:48 PM
هي عاد كدي
والليل بغطغط في نهار الفرقة
تمرقي يانجوم
والقمرا تتفلهم علي بالشينة دايما تبتدي
وانا والدموع لولينا شافع الوجعة
لا داير ينوم لا داير ينزل من كتف ريدي ويقوم
الليل ده كلو غناي يحوم
اللوم تعال اللوم تعال
شان الحروف نامت زمااااان
ما صاحي الا اللوم معاي
لوم روحي لوم الناس
ولوم الريدة لوم الدنيا كلها
الا عاد لوم الحبيب مازيو لوم
لوم كلو رقة وهدهدة لوم كلو ريد
الدمعة تتدفق قصيد
والاهة تتشتت نشيد
والوجعة فيني جنس رقيص
حتت ملامحا ترترت فيني الخجل
بحر الغرام يطمح يزيد
وانا صارة وشي عشان اترس امنايتي وما تزيد
والقاني فيك متدفقة واقعد معاك واحلفك
عاد النبي وذممت احساس الغناوي البيني بينك والقصيد
لا تصدها اشواقي دوم ماشات عليك لاتصدها
والريدة تتجمع حنين لا تقدها
شان ما تنقط لوم ودمعات العشق حارات تتش
ونفوسنا ناشف حدها
في ذمتك شوف وجعتك
شقة حنين احلامي كر
سوق سكة الريد القبيل بارت ملامح سكتك
خلت قليبي يسوي فر
واتصافحن دمعاتي وخدود الفرح
واتقالد الطيف والخيال ساعة السفر
وانا واقفة في نفس المكان مما مشيت
فارقني ضلي الفات عليك
شايفاهو في ضلك عتر
ووقع مناي اتردخ الشوف الفتر
وانا واقفة في نفس المكان مما مشيت
احساسي راح لي الليلة ما لقيت ليو اتر
وانا واقفة في نفس المكان!!!!.

شموخ النيل
07-22-2014, 05:28 PM
ووقع مناي اتردخ الشوف الفتر
وانا واقفة في نفس المكان مما مشيت
احساسي راح لي الليلة ما لقيت ليو اتر
وانا واقفة في نفس المكان!!
إبداع و رووووووووووووووووووووووووووعة